Vegfarendum norðan- og austanlands er bent á að í nótt og fyrramálið má reikna með hríðarveðri og slæmu skyggni frá Skagafirði og austur á Möðrudalsöræfi.
Þetta kemur fram í tilkynningu frá veðurfræðingi Vegagerðarinnar.
Hvasst verður frá Öræfum og austur á Reyðarfjörð í nótt og fyrramálið og staðbundnar hviður 35-40 m/s. Þá er gert ráð fyrir því að færð spillist síðar í dag vegna snjókomu inn til landsins.
„Í kvöld og nótt gengur í norðvestan 15-23 m/s austan til á landinu og þá dregur úr úrkomu sunnanlands. Minnkandi norðlæg átt og áfram rigning eða snjókoma um landið norðanvert á morgun, en þurrt að kalla sunnan heiða. Norðangola eða -kaldi og úrkomuminna síðdegis,“ segir í hugleiðingum veðurfræðings á Veðurstofu Íslands.