Kylian Mbappé náði að komast fram úr brasilísku knattspyrnugoðsögninni Pelé á einu sviði með marki sínu gegn Pólverjum í sextán liða úrslitum heimsmeistaramótsins í Katar í dag.
Mbappé varð með þessu marki fyrstur til að skora átta mörk í lokakeppni heimsmeistaramóts karla áður en hann verður 24 ára gamall.
Pelé náði að skora sjö mörk fyrir Brasilíu í lokakeppni HM áður en hann varð 24 ára. Þar af skoraði hann tvö í úrslitaleiknum gegn Svíum árið 1958, og sex alls í þeirri lokakeppni, þá aðeins 17 ára gamall.
Mbappé kom Frökkum í 2:0 á 74. mínútu í leiknum gegn Pólverjum.
Uppfært:
Mbappé skoraði aftur á 90. mínútu, stórglæsilegt mark, og er þar með búinn að skora níu mörk samtals á HM og er markahæstur á þessu móti með fimm mörk.