Árið 1953 sendi Eggert Thorberg Kjartansson fimm lög í danslagakeppni SKT, sem skemmtiklúbbur templara stóð fyrir. Lögin vor útsett fyrir keppnina, en svo illa vildi til að nóturnar glötuðust. Nú, tæpum 70 árum síðar, hafa þau verið útsett og nýr texti saminn við þrjú þeirra. Lögin voru tekin upp í Stúdíó Sýrlandi og Hljóðrita. Hægt er að nálgast eintak á vefsíðu Karolinafund.
„Pabbi, Eggert Thorberg, sendi fimm lög í danslagakeppni SKT árið 1953,“ segir Lilja Eggertsdóttir. „Kröfurnar voru að höfundar þyrftu að senda inn fimm lög í formi dansa; tangó, rúmbu, sömbu og vals. Pabbi fékk aðstoð við útsetningarnar á sínum tíma, en nóturnar að lögunum glötuðust. Kjartan bróðir minn sem er einnig tónlistarmaður, skrifaði upp lagið „Í kvöld“ eftir söng pabba, en það er eina lagið sem pabbi samdi texta við.“
Hún segir að tæpum sjötíu árum síðar hafi hann sungið önnur þrjú lög fyrir hana og hún skrifað upp nóturnar að þeim. Fimmta lagið sem faðir hennar sendi inn í keppnina er gleymt. „Ég útsetti einnig lögin og annar bróðir okkar, Snorri Pétur, samdi texta við þrjú laganna. Textann við lagið „Í kvöld“ orti pabbi til mömmu, Hólmfríðar Gísladóttur, um miðja síðustu öld, í tilhugalífi þeirra. Þau héldu upp á 67 ára brúðkaupsafmæli nú í mars.“
Lilja segir foreldra sína hafa hist fyrir vestan, en Fríða, eins og móðir hennar er kölluð, stundaði nám við Húsmæðraskólann á Staðarfelli.“ Í þá daga var mikil hefð að dansa samkvæmisdansa á böllum enda er lagið „Í kvöld“ tangó en það má einnig spila sem rúmbu. Allir textarnir eru litaðir af umhverfinu vestur á Breiðafirði, meðal annars Fremri-Langey, þar sem pabbi er fæddur og uppalinn en einnig stemmingunni á sveitaböllunum á þeim tíma, sérstaklega í samkomuhúsinu á Staðarfelli, þar sem piltarnir í sveitinni biðu í ofvæni eftir að bjóða stúlkunum í húsmæðraskólunum upp í dans.”
Hjónin eiga fimm börn; Kjartan, Eggert, Gísla Karel, Snorra Pétur og Lilju. Mikill áhugi var fyrir tónlist á heimilinu. Móðirin söng mikið og faðirinn spilaði á gítar og var m.a. í kór múrara. „Þau höfðu metnað fyrir að senda okkur öll í bæði dans og tónlistarnám en tvö okkar vinnum við tónlist í dag.”
Söngtríóið Skel var stofnað haustið 2018 af þremur söngkonum. Þeim Særúnu Rúnudóttur, Lilju Eggertsdóttir og Kristínu Sigurðardóttur. Tríóið hefur reglulega komið fram m.a. í tónleikaröðinni Á ljúfum nótum í Fríkirkjunni en þar fara fram hádegistónleikar, oft á fimmtudögum. Lilja er jafnframt listrænn stjórnandi þeirra raðar. Með tríóinu spila Gunnar Gunnarsson á píanó, Þorgrímur Jónsson á kontrabassa og Erik Qvick á trommur. Bandið flytur tónlist úr öllum áttum, bæði íslenska og erlenda en hefur aðallega haldið sig við tónlist sem var vinsæl á stríðsárunum og eftir það.
„Pabbi, sem verður níræður á þessu ári, á sér þá ósk heitasta að lögin hans fái loksins að heyrast, til dæmis hjá Svanhildi Jakobsdóttur í Óskastundinni á Rás 1,“ segir Lilja. „Þess vegna var ákveðið að drífa í að klára að útsetja, taka upp og gefa út lögin. Allir flytjendur tóku vel í þá hugmynd og er allri vinnslu lokið og því aðeins eftir að koma tónlistinni út. Upptökustjóri var Hafþór Karlsson og Þóra Dögg Jónsdóttir hannaði plötuumslag. Við vildum athuga hvort fleiri hefðu áhuga á að hlýða á tónlistina og höfum við fengið mjög góðar undirtektir.“
Hægt er að næla sér í eintak með því að fara inn á vefsíðu Karolinafund
