Hæstiréttur sýknaði í dag íslenska ríkið af kröfu um skaðabótaksyldu vegna handtöku sem fram fór árið 2010 og staðfesti þar með sýknudóma úr héraði og við Landsrétt. Stefnandi fór í hjartastopp við handtöku lögreglu og hlaut dreifðan heilaskaða fyrir vikið.
Stefnanda lánaðist ekki að sýna fram á að orsakatengsl fyndust milli handtöku hans og hjartastoppsins og var frekar talið líklegt að ástand mannsins við handtöku og ofsafengin viðbrögð hans hafi valdið hjartastoppi.
„Í málinu lágu fyrir fjórar matsgerðir sérfræðinga um orsakir þess að hjarta A hætti að slá. Af þeim var ráðið að ástand A þegar hann var handtekinn hafi verið frumorsök þess að hjarta hans stöðvaðist og að ofsafengin viðbrögð hans við handtökunni hafi átt þátt í eða aukið líkurnar á hjartastoppinu. Matsmenn voru hins vegar ekki sammála um hvort og þá hversu líklegt væri að hjarta A hefði stöðvast enda þótt ekki hefði komið til handtökunnar. Var það mat héraðsdóms og Landsréttar, sem skipaðir höfðu verið sérfróðum meðdómsmönnum, að A hefði ekki lánast sönnun um orsakatengsl á milli handtöku og líkamstjóns og staðfesti Hæstiréttur þá niðurstöðu,“ segir í dómi Hæstaréttar.
Allur málskostnaður var látinn niður falla en gjafsóknarkostnaður greiðist úr ríkissjóði, þar af 900 þúsund krónur sem greiddar eru lögmanni stefnanda.