Hjörvar Hafliðason, Dr. Football, hrósaði Arnari Grétarssyni, þjálfara KA, í hástert í nýjasta þætti sínum.
Arnar tók við KA um miðjan júlí í fyrra. Þá var liðið aðeins með 4 stig eftir sex umferðir í Pepsi Max-deild karla. Undir hans stjórn endaði KA í sjöunda sæti deildarinnar.
Í ár hefur gengi Akureyringa verið frábært. Liðið er í þriðja sæti með 39 stig þegar ein umferð er eftir.
Arnar var látinn fara frá Breiðabliki árið 2017. Næsta starf hans í þjálfun var hjá Roeselare í Belgíu árið 2019. KA fékk hann svo til sín í fyrra, 2020.
Hjörvar er hissa á því að eins stór biti og Arnar hafi verið laus eins lengi og raun bar vitni.
,,Arnar Grétarsson er búinn að gera meiriháttar hluti fyrir norðan og verður ábyggilega eftirsóttur. Arnar Grétarsson átti aldrei að labba um atvinnulaus þjálfari í 1-2 ár,“ sagði Hjörvar í þættinum.
,,Það er ánægjulegt að fá hann aftur, hann er hörku, hörku þjálfari,“ bætti hann við.
KA fær FH í heimsókn í lokaumferð Pepsi Max-deildarinnar. Vinni liðið þann leik gulltryggir það sér þriðja sætið.