Páll Einarsson jarðeðlisfræðingur sagði í samtali við Rás 2 í dag að eldgos við Keili sé nú möguleiki sem verði að kanna. Nýjar gervitunglamælingar frá því í dag sýni rúmmálsaukningu sem verði að taka tillit til þegar sérfræðingar meta hvert framhaldið geti orðið í jarðskjálftahrinunni á Reykjanesskaga. Taka þurfi möguleikann á gosi með í reikninginn.
Páll segir að staðsetningin sé reyndar mjög heppileg fyrir gos. Hann segir jafnframt að ef gos hæfist við Keili tæki það langan tíma fyrir hraun að renna frá þeim stað. Mikið hraun geti safnast þar fyrir áður en það byrjar að renna frá staðnum. Páll sagði ennfremur:
„Nýjasta vending í málinu er þetta að mælingarnar frá því í morgun virðast sýna að við verðum að taka þann möguleika með í reikninginn að það sé þarna kvika byrjuð að streyma upp í neðri hluta skorpunnar. Hún er ekki komin upp undir yfirborðið eða neitt þess háttar. Ef hún skyldi gera það þá er líklegasti gosstaðurinn einhvers staðar á bak við Keili, séð héðan frá höfuðborgarsvæðinu.“
