Joseph Borell, utanríkismálastjóri Evrópusambandsins, segir að Evrópusambandið verði að taka hótunum Vladímírs Pútíns, forseta Rússlands, alvarlega. Í samtali við BBC segir Borell að nú sé „hættulegt augnablik“ að eiga sér stað í stríðinu.
Hótanirnar sem Borell vísar til komu í ávarpi frá Pútín fyrr í vikunni. Í ávarpinu sagði Pútín að Rússland byggi yfir mismunandi gereyðingarvopnum og að hann myndi nota allt í vopnabúrinu til að vinna stríðið. „Ég er ekki að plata,“ sagði hann svo.
Í sömu ræðu tilkynnti forsetinn um herkvaðningu sem hefur valdið því að fjölmargir Rússar freista þess nú að flýja landið til að koma sér hjá því að verða sendir á víglínurnar. Herkvaðningin nær þó ekki til allra, einungis þeirra sem eru í varaliði hersins.
Lesa meira: Pútín tilkynnir um herkvaðningu -„Ég er ekki að plata“
Illa hefur gengið hjá rússneska hernum í stríðinu að undanförnu en úkraínski herinn hefur náð að ýta þeim til baka á nokkrum vígvöllum. „Það er búið að ýta rússneska hernum út í horn og viðbrögð Pútíns við því – að hóta því að nota kjarnorkuvopn – það er mjög slæmt,“ segir Borell. „Þegar fólk segist ekki vera að plata, þá verðurðu að taka því alvarlega.“
Borell segir að það verði að diplómatísk lausn á stríðinu verði að nást og að sú lausn verði að koma til með að varðveita fullveldi sem og landhelgi Úkraínu. „Hin lausnin er að klára þetta stríð en þá verður ekki friður og við munum fá annað stríð,“ segir hann.
