Steven Gerrard, Liverpool-goðsögn, mun mæta með sitt lið, Rangers, á Anfield í sumar til þess að leika æfingaleik.
Gerrard stýrði Rangers til fyrsta Skotlandsmeistaratitils félagsins í tíu ár í vor. Hans menn rúlluðu yfir deildina og náðu í 102 stig. Þá töpuðu þeir ekki leik.
Æfingaleikur Liverpool og Rangers fer fram í lok júlí. Ef allt fer eftir óskum varðandi afléttingar á samkomutakmörkunum í Bretlandi vegna kórónuveirufaraldursins mun fjöldi stuðningsmanna Liverpool geta mætt til þess að hylla goðsögnina. Gerrard lék yfir 700 leiki fyrir félagið.
Árangur stjórans með Rangers hefur vakið verðskuldaða athygli hjá stærri félögum. Þá hefur oft verið rætt um það að hann muni taka við sem stjóri Liverpool einn daginn. Það þarf þó líklega að bíða aðeins þar sem menn eru ansi sáttir með störf Jurgen Klopp, núverandi stjóra liðsins, eins og er.