Samkvæmt breska götublaðinu DailyStar eru leikmenn Everton allt annað en sáttir við stöðu mála í kjölfar frétta um liðsfélaga sinn Gylfa Þór Sigurðsson. Heldur blaðið því fram að liðsfélagar Gylfa vilji að hulunni sé svipt af nafni íslenska landsliðsmannsins í fjölmiðlum ytra.
Eins og greint var frá fyrr í vikunni var Gylfi handtekinn og yfirheyrður vegna meints brots gegn einstaklingi undir lögaldri. Everton gaf út tilkynningu í vikunni þar sem handtaka leikmanns þeirra var staðfest en Gylfi var ekki nefndur á nafn.
Mikið hefur verið fjallað um málið, bæði hér á landi og á meginlandinu. Breskir fjölmiðlar hafa þó ekki enn nafngreint Gylfa af lagalegum ástæðum.
Það eru leikmenn Everton ósáttir við samkvæmt heimildarmanni DailyStar. „Leikmennirnir eru virkilega æstir, þeir eru ekki ánægðir með að hafa verið dregnir inn í þetta. Reyndustu leikmenn Everton hafa fengið símtöl allan sólarhringinn frá öðrum leikmönnum deildarinnar, allir vilja frekari upplýsingar.“
Fabian Delph, liðfélagi Gylfa hjá Everton, er líklega sá leikmaður sem var hvað ósáttastur með að ekki sé enn búið að nafngreina Gylfa í Englandi. Ástæðan fyrir því er sú að fjölmiðlar á Englandi hafa gefið það út að leikmaðurinn sem um ræðir sé 31 árs gamall, Delph er eini leikmaður Everton sem er jafngamall Íslendingnum.
The Athletic greindi frá því í gær að Delph væri fokvondur yfir því að hafa legið undir grun af hálfu almennings í máli sem hann væri alsaklaus af.
Heimildarmaður DailyStar segir svo að ein stjarna Everton hafi verið „brjáluð eftir að hafa fengið fimm hringingar“ frá Gylfa. Símtölin eiga að hafa komið eftir að þeim var skipað að hafa ekki samband við Gylfa vegna málsins.