Nú hafa fleiri en 250.000 fallið frá vegna Covid-19 í Bandaríkjunum, samkvæmt nýjustu tölum frá Johns Hopkins-háskóla. Þær sýna fram á 250.029 dauðsföll. Fréttirnar berast á sama tíma og víða um Bandaríkin greinist metfjöldi smitaðra en ríkisstjórn Bandaríkjanna virðist ekki vera að ná tökum á faraldrinum.
Donald Trump Bandaríkjaforseti neitar enn að viðurkenna sigur Joes Bidens í forsetakosningunum þar vestra en Biden sagði á dögunum að „fleiri gætu dáið“ ef áfram yrði komið í veg fyrir valdaskipti.
Rúmlega 11 milljónir Bandaríkjamanna hafa smitast í faraldrinum en svo hár hefur smitfjöldinn ekki verið í nokkru öðru landi. Einnig hafa flestir látist úr Covid-19 í Bandaríkjunum. Þjóðin er á meðal þeirra verst settu hvað varðar dánartíðni.
Undanfarnar tvær vikur hafa fleiri en 100.000 smitast daglega í Bandaríkjunum. Aukning í daglegum smitfjölda hefur orðið í nánast hverju einasta ríki Bandaríkjanna en staðan er sérstaklega slæm í Miðvesturríkjunum.
Fyrr í dag tilkynntu embættismenn um lokun opinberra skóla í New York eftir að 3% borgarbúa höfðu greinst smitaðir.
Bandaríkjamenn, eins og fleiri þjóðir, binda miklar vonir við tvö bóluefnanna sem hafa tilkynnt um afar jákvæðar niðurstöður rannsókna. Bólusetning er þó enn ekki í sjónmáli og þarf heimsbyggðin líklega að bíða í nokkra mánuði eftir henni.
Sérfræðingar hafa varað við því að Bandaríkin gætu staðið frammi fyrir erfiðum vetri ef ekki verði gripið til aðgerða víðs vegar um Bandaríkin.