Tveir leikir Arons á sama sólarhringnum

Aron Pálmarsson og félagar í handknattleiksliði Barcelona léku í dag annan leikinn á sama sólarhringnum þegar þeir tóku á móti Benidorm í spænsku 1. deildinni í dag.

Leiknum var frestað á dögunum vegna kórónuveirusmits í röðum Barcelona. Í gærkvöld lék liðið við Aalborg í Meistaradeild Evrópu og vann góðan sigur, 42:33, þar sem Aron var mjög áberandi, skoraði fimm mörk og átti fimm stoðsendingar.

Hann tók því hinsvegar rólega í dag og skoraði eitt mark í stórsigri Barcelona, 43:29. Barcelona vann þar með sinn áttunda sigur í fyrstu átta leikjunum og er með 16 stig á toppi deildarinnar en Bidasoa, Granollers og Valladolid eru öll með 12 stig. Bidasoa hefur unnið alla sína leiki eins og Barcelona en hefur aðeins spilað sex leiki.

• Blogga um frétt