Skipt um alla áhöfn olíuskipsins Keilis

Grunur kom upp um kórónuveirusmit eins skipverja um borð í Keili, olíuflutningaskipi Olíudreifingar, í fyrradag. Skipið liggur við bryggju á Þórshöfn og í gær var unnið að því að skipta um áhöfn og sótthreinsa skipið.

Hörður Gunnarsson, framkvæmdastjóri Olíudreifingar, segir að ákveðið hafi verið að skipta um alla áhöfnina, þegar þessi grunur kom upp, til að tryggja að skipið geti haldið áfram. Áhöfnin yfirgaf skipið og fór til Egilsstaða í sýnatöku. Skipið var síðan sótthreinsað áður en ný áhöfn fór um borð og tók til við að ljúka dælingu úr skipinu á Þórshöfn.

„Þetta tefur okkur aðeins en ekki meira en eins og ein bræla, sem nóg er af þessa dagana,“ segir Hörður og telur að áhöfnin og skipið nái að sinna sínum verkefnum, þrátt fyrir töfina. Miklar annir eru í flutningum olíu um þessar mundir, sérstaklega vegna loðnuvertíðarinnar, og þess vegna eru fullar tvær áhafnir á Keili og hægt að skipta um ef slík mál koma upp.

Frétt af mbl.is

Annir fram undan í olíuflutningum