Laus við kórónuveiruna

Kevin De Bruyne, miðjumaður enska knattspyrnufélagsins Manchester City, er laus við kórónuveiruna. Þetta tilkynnti Pep Guardiola, stjóri City, á blaðamannafundi í dag.

City undirbýr sig nú fyrir leik gegn Aston Villa í ensku úrvalsdeildinni sem fram fer í Birmingham á morgun.

Þrátt fyrir að De Bruyne sé laus við veiruna þá verður hann ekki í leikmannahóp liðsins á morgun en hann hefur misst af síðustu þremur leikjum liðsins.

„Kevin hefur ekkert æft með okkur undanfarnar vikur,“ sagði spænski knattspyrnustjórinn.

„Hann fékk neikvætt úr síðustu skimun sinni fyrir kórónuveirunni og ætti því að geta hafið æfingar að nýju á næstu dögum,“ bætti Guardiola við.

• Blogga um frétt