Nicholas nálgast Texas

Hitabeltisstormurinn Nicholas gæti orðið að fellibyl áður en hann nær til Texas. Þessu varaði bandaríska fellibyljamiðstöðin við í dag.

Klukkan sjö í morgun var stormurinn 65 kílómetra frá ánni Rio Grande, sem liggur við landmæri Bandaríkjanna að Mexíkó. 

Talið er að stormurinn geti valdið miklum flóðum á þéttbýlisstöðum. 

Hvetja fólk til að vera heima

Greg Abbott, ríkisstjóri Texas, hvatti íbúa ríkisins til að fylgja viðvörunum og leiðbeiningum stjórnvalda.

„Við búumst við mikilli úrkomu í kvöld og á morgun. Ég vil eindregið hvetja ykkur til að halda ykkur heima í kvöld,“ tísti Sylvester Turner, borgarstjóri Houston.

Texas er ekki ókunnugt fellibyljum en vísindamenn vara við því að loftslagsbreytingar geti valdið því að stormurinn verði öflugri og valdi aukinni hættu fyrir strandþorp.

• Blogga um frétt