Smitið mjög óheppilegt

Roberto Martinez þjálfari belgíska karlalandsliðsins í fótbolta ræddi við blaðamenn á Laugardalsvelli í kvöld. Belgía og Ísland eigast við í Þjóðadeild UEFA annað kvöld og verður íslenska liðið án Eriks Hamréns og Freys Alexanderssonar þjálfara vegna kórónuveirusmits innan íslenska teymisins. Spánverjinn segir það óheppilegt.

Frétt af mbl.is

Þorgrímur sá smitaði í starfsliði Íslands

„Þetta er mjög óheppilegt. Þú vilt að allir fái að njóta leiksins og fá að vera með leikmönnum. Landsliðsþjálfarar fá ekki langan tíma með leikmönnum á hverju ári og þetta er mjög óheppilegt. Við óskum öllum þeim sem smituðust góðs bata og vonandi fara þeir í gegnum þetta einkennalausir.“

Marga mikilvæga leikmenn vantar í íslenska liðið og þá hefur Belgía unnið þrjá sannfærandi sigra á íslenska liðinu á síðustu tveimur árum með markatölunni 10:1. Martínez á samt sem áður von á erfiðum leik þar sem einnig vantar leikmenn í hans lið. 

„Það er ekkert sem heitir auðveldur sigur. Það vantar lykilmenn í íslenska liðið en það er eðlilegt þegar það eru þrír leikir á skömmum tíma. Okkur vantar líka fimm mikilvæga leikmenn; Thibaut Courtois, Eden Hazard, Kevin De Bruyne, Thorgan Hazard og Dries Mertens. Við einbeitum okkur frekar að þeim leikmönnum sem við erum með hérna,“ sagði sá spænski.

• Blogga um frétt