Ást við fyrstu sýn hjá Victoriu Beckham

Það var ást við fyrstu sýn þegar Victoria Beckham hitti eiginmann sinn, knattspyrnuhetjuna David Beckham, í fyrsta sinn. Kryddpían fyrrverandi og fatahönnuðurinn greindi frá þessu þegar hún var að auglýsa nýja snyrtivörulínu á Instagram. 

„Leyfið mér bara að segja ykkur að ást við fyrstu sýn er til. Ég féll fyrir brosi Davids í byrjun en þegar ég kynntist honum betur komst ég að því hversu vel mér leið með honum ... eins og besta útgáfan af sjálfri mér,“ skrifaði Victoria Beckham og birti mynd af varalit og 21 árs gamalli brúðkaupsmynd af þeim hjónum. 

Beckham-hjónin eru búin að vera saman síðan árið 1997. Þau eignuðust sitt fyrsta barn af fjórum í mars 1999 og giftu sig nokkrum mánuðum seinna. 

• Blogga um frétt