Sóttvarnareglur og fjöldatakmarkanir hafa verið mörgum veitingahúsum Þrándur í Götu, en sum þeirra hafa þess vegna tekið upp á því að bjóða upp á svokölluð „take-away“ tilboð sem útleggjast á íslensku sem útréttatilboð.
Þráinn Freyr Vigfússon, yfirkokkur hjá Sumac á Laugavegi, segir að þótt heimsendur matur bæti ekki upp fyrir fyrri umferð hafi slík starfsemi hjálpað til við að halda staðnum á floti. Þráinn segir að á góðu laugardagskvöldi borði um 100 manns mat frá Sumac heima hjá sér, en að aðsóknin hafi dregist saman frá því í fyrstu bylgju.
„Ég myndi segja að þetta hafi dregist saman um svona 30% síðan í fyrstu bylgjunni,“ segir Þráinn.
Sumac bauð ekki upp á útrétti áður en kórónuveiran skaut upp kollinum og því þurfti veitingahúsið að aðlagast hratt. Verklag í eldhúsinu hafi breyst töluvert, þar sem allur matur þarf að vera tilbúinn á sama tíma, ólíkt því sem gengur og gerist þegar gestir borða á veitingahúsum.
„Þetta er góð viðbót við það sem var,“ segir Þráinn. „Allir eru að reyna að vinna þetta eins vel og hægt er.“
Matarkjallarinn er annar veitingastaður sem byrjaði með útrétti þegar sóttvarnareglur tóku gildi í vor. „Það er búin að vera ágætis aðsókn í þetta, og það er mest að gera um helgar,“ segir Valtýr Bergmann, einn eigenda Matarkjallarans.
Líkt og Þráinn segir Valtýr að aðsóknin hafi minnkað frá því í fyrstu bylgju. Um helgar panti yfirleitt meira en 70 manns mat heim, en á virkum dögum sé það oft á milli 40 og 50.
„Þetta lágmarkar mínusinn,“ segir Valtýr. „Það er ekki víst að mörg fyrirtæki muni lifa þetta af en þau fyrirtæki sem stóðu ágætlega fyrir munu eflaust komast í gegnum þetta.“
Hann segist þó sjá mikinn mun í viðmóti þeirra sem komi og borði í sal. „Núna er fólk meðvitaðra þegar það kemur hingað inn. Það er með grímu og spritt. Sú hegðun hefur breyst.“