Handbolti

Kristján hættir hjá Guif

Ingvi Þór Sæmundsson skrifar
Kristján Andrésson vann silfur með sænska landsliðinu á EM 2018.
Kristján Andrésson vann silfur með sænska landsliðinu á EM 2018. vísir/getty

Kristján Andrésson hættir sem íþróttastjóri Eskilstuna Guif í vor. Hann er meðal þeirra sem hefur verið orðaður við starf landsliðsþjálfara Íslands.

Undanfarin tvö ár hefur Kristján starfað sem íþróttastjóri Guif. Hann hættir þar um miðjan maí vegna fjárhagsástæðna.

„Þú hefur þrjú ár til að koma fjárhagnum í lag og þess vegna grípum við til þessara ráðstafana,“ sagði Mats Bengtsson, framkvæmdastjóri Guif, við P4 Sörmland.

Kristján spilaði með Guif á árunum 1999-2004 og þjálfaði liðið svo á árunum 2007-16. Hann var svo þjálfari sænska landsliðsins 2016-20.

Kristján hefur verið orðaður við starf landsliðsþjálfara Íslands. Í viðtali í Handkastinu kvaðst hann hafa áhuga á starfinu.

„Já, ég held að ég deili því nú með mörgum þjálfurum og mörgum sérfræðingum heima á Íslandi. Er það ekki?“ sagði Kristján.

Hann lék um tíma með íslenska landsliðinu, meðal annars á Ólympíuleikunum í Aþenu 2004. Faðir hans, Andrés Kristjánsson, lék einnig með landsliðinu.




Fleiri fréttir

Sjá meira


×