Það er svo mikið að ger­ast að ég veit ekki hvort ég gæti talað um einn sér­stakan atburð. Þá er rök­rétt að fara yfir hvers vegna hið alþjóð­lega sam­fé­lag er að fara í vaskinn. Hvers vegna erum við orðin svona sundruð? Af hverju er sam­fé­lags­legur klofn­ingur að aukast útum allan heim sam­tím­is? Getum við ekki öll bara fengið okkur bröns saman og rætt mál­in?

Inter­netið er for­senda Arab­íska vors­ins, Hong Kong upp­þot­anna og BLM-hreyf­ing­ar­inn­ar. Sömu­leiðis er inter­netið for­senda þess að fólk trúir á flata jörð, QAnon og kenn­ingar um að Dagur B. Egg­erts­son hafi keypt bíla­stæði frá Reykja­vík­ur­borg. Fjöl­breyti­leiki Inter­nets­ins hefur færst frá klígju­kenndum blogg­færslum á MySpace yfir í efni sér­sniðið að þörfum og skoð­unum neyt­enda, sér­valið af algóritma sem vill halda not­endum virkum sama hvað.

Land­vættir nútíma­sam­fé­lags­ins eru Face­book, Youtu­be, Porn­hub og Goog­le, sem vernda ekki Ísland heldur hags­muni fyr­ir­tækja­eig­enda. Face­book er drek­inn, þar sem þú færð að spýta eldi og brenni­stein á smá­menni án eft­ir­sjár, Google er gamm­ur­inn sem fylgist með og svífur ætíð yfir þér, Youtube er nautið sem baular og hleypur úr einu yfir í annað í stefnu­lausu móki og Porn­hub er berg­ris­inn, vel skeggj­aður hell­is­búi sem þorir ekki að sjá sól­ina eða tala við mann­fólk.

Inter­netið snýst ekki lengur um að upp­lýs­ingar séu frjálsar öll­um, heldur um að halda not­endum innan þeirra eigin þæg­ind­ara­mma. Ef skoð­anir and­snúnar hug­sjónum not­and­ans koma fram,  t.d. að Borg­ar­línan sé góð, Stalín hafi verið fúl­menni eða jafn­vel að sólin sé ekki ljósa­pera hönnuð af NASA eru not­endur lík­legir til þess að skrá sig út og valda þannig Net­fyr­ir­tæki Ehf. fjár­hags­legum skaða. 

Við höfum sem net­vætt, lýð­ræð­is­legt sam­fé­lag verið tek­inn og étinn. Á meðan Face­book-fíklar tóku yfir þing­hús Banda­ríkj­anna til þess að bjarga börnum frá mannæt­u-demókrötum seldi Face­book per­sónu­gögn þeirra til hæst­bjóð­enda. Kenn­ingar um bólu­efni, nýtt heims­skip­an, Soros, píramída byggða af geim­verum og hrun vest­ræns sam­fé­lags vegna öfga­fullra flótta­barna eru þreyt­andi á manns­sál­ina. Hvers vegna nennir fólk að trúa þessu?

Þar sem ég er ungur og óþrosk­aður trúi ég að fólk sé oft­ast gott. Fólk sem til­heyrir skúma­skotum sam­fé­lags­ins reynir að upp­lýsa til­vist sína með öfga­kenndum hug­myndum sem flokk­ast undir sam­sær­is­kenn­ing­ar, því hefð­bundnar útskýr­ingar hafa brugð­ist þeim. Ef ég mætti umorða boð­skap stór­skálds­ins og heim­spek­ings­ins Yoda: sam­fé­lags­miðla­notkun eykur van­líð­an, van­líðan eykur ótta, ótti eykur hatur og hatur leiðir til auk­ins gróða sam­fé­lags­miðla. 

Verum samt bjart­sýn, því það er hægt að fyr­ir­byggja að fólk leiti sér svara í sam­sær­is­kenn­ingum eða öfga­hug­mynda­fræð­um. Þetta er gert með því að hlusta betur á fólk sem finnst eins og rödd þeirra sé huns­uð, hvort sem það er öryrki eða grunn­skólakrakki. Sig­ur­inn er tví­þætt­ur, því við náum líka að fyr­ir­byggja að fólk finni eðlu­menn­ina sem stjórna heim­inum með­ ör­flögum undir kló­sett­set­um.

Höf­undur er nemi við Mennta­­­­skól­ann á Akur­eyri.