Ber mikla virðingu fyrir Íslandi

„Ég myndi ekki segja að við værum sigurstranglegri, ekki fyrr en við vinnum þá. Ég ber mikla virðingu fyrir Íslandi,“ sagði Faruk Hadzibegic, landsliðsþjálfari karlaliðs Bosníu í fótbolta, á blaðamannafundi á Bilino Polje-vellinum í Zenica í dag.

„Auðvitað viljum við fara á EM. Við eigum möguleika á að ná fyrsta eða öðru sæti en líka á að komast í umspil. Best væri að ná í efsta sætinu, en það er kannski ekki alveg raunhæft, því við erum með góðum liðum í riðli,“ bætti hann við.

Hadzibegic var á staðnum þegar Ísland tapaði með svekkjandi hætti í vináttuleik gegn Svíþjóð á Algarve í Portúgal í janúar. Hann var hrifinn af því sem hann sá frá íslenska liðinu í þeim leik.

„Ísland er ekki með síðra lið en fyrir fimm árum. Þú verður að bera virðingu fyrir þeim leikmönnum sem eru í liðinu núna. Ég var mjög hrifinn af því sem ég sá í síðustu vináttulandsleikjum hjá Íslandi. Það verður ekki létt, en við munum sækja til sigurs,“ sagði hinn 65 ára gamli Hadzibegic.

• Blogga um frétt