Borche Ilievski hefur látið af störfum sem þjálfari karlalaiðs ÍR í körfuknattleik en þetta staðfesti hann í samtali við mbl.is í morgun.
Þjálfarinn náði frábærum árangri með ÍR tímabilið 2018-19 þegar kom liðinu í úrslit Íslandsmótsins þar sem ÍR-ingar töpuðu fyrir KR í oddaleik.
Það hefur hins vegar lítið gengið upp hjá liðinu undanfarin tvö tímabil og eru ÍR-ingar án sigurs í fyrstu þremur leikjum sínum í úrvalsdeild karla, Subway-deildinni, á tímabilinu.
„Að vel ígrunduðu máli ákvað ég að stíga til hliðar sem þjálfari,“ sagði Borche í færslu sem hann birti á Facebook í dag.
„Ég verð ævinlega þakklátur félaginu sjö frábær ár og öllu fólkinu sem ég starfaði með á þessum tíma, bæði leikmönnum og starfsfólki.
Ég vil þakka stuðningsmönnunum Ghetto Huligans fyrir ótrúlegan stuðning, bæði þegar vel gekk og eins þegar illa gekk.
ÍR mun alltaf eiga sérstakan stað í mínu hjarta og ég verð eilífðar stuðningsmaður félagsins,“ sagði Borche meðal annars.