Fyrrverandi knattspyrnumaðurinn Papa Bouba Diop frá Senegal lést í dag, 42 ára að aldri.
Í fréttatilkynningu frá Fulham og Lens, hans fyrrverandi félögum, kemur fram að leikmaðurinn hafi látist eftir langvarandi veikindi.
Mirror greinir frá því að leikmaðurinn hafi lengi glímt við Charcot-Marie-Tooth-taugasjúkdóminn.
Diop gerði garðinn frægan með Fulham og Portsmouth í ensku úrvalsdeildinni en hann lék einnig með West Ham og Birmingham á Englandi.
Hann varð enskur bikarmeistari með Portsmouth árið 2008, þá samherji Hermanns Hreiðarssonar, varð grískur bikarmeistari með AEK Aþenu árið 2011 og svissneskur meistari með Grasshopper í Sviss árið 2001.
Diop lagði skóna á hilluna árið 2013 en hann lék 63 landsleiki fyrir Senegal frá 2001 til 2008 þar sem hann skoraði ellefu mörk. Hann átti drjúgan þátt í óvæntri framgöngu senegalska liðsins á HM 2002, þar sem hann skoraði sigurmarkið í óvæntum sigri á fráfarandi heimsmeisturum Frakka í upphafsleik keppninnar og fór með liðinu í átta liða úrslit.
We are devastated to hear news reports this evening that Papa Bouba Diop has passed away, aged 42.
— Fulham Football Club (@FulhamFC) November 29, 2020
Rest well, Wardrobe 🖤 pic.twitter.com/rvU53Vqkmn