Rashford og Mount draga sig úr enska hópnum

Marcus Rashford, sóknarmaður Manchester United, og Mason Mount, miðjumaður Chelsea hafa neyðst til þess að draga sig úr enska landsliðshópnum fyrir fyrstu leiki liðsins í undankeppni EM 2024 í knattspyrnu í vikunni.

Rashford fékk högg í 3:1-sigri Man. United á Fulham í ensku bikarkeppninni í gær og varð fyrir smávægilegum meiðslum af þeim sökum.

Mount hefur verið meiddur undanfarinn mánuð og nú er ljóst að hann verður ekki búinn að jafna sig á meiðslum á grindarbotni í tæka tíð fyrir leiki Englands gegn Ítalíu ytra á fimmtudag og Úkraínu á Wembley-leikvanginum þremur dögum síðar.

Áður hafði Nick Pope, markvörður Newcastle, dregið sig úr hópnum og Fraser Forster hjá Tottenham Hotspur verið kallaður inn í hans stað.

Engir leikmenn verða hins vegar kallaðir inn í enska hópinn vegna meiðsla Rashfords og Mounts.

• Blogga um frétt