Það varð ljóst strax að Erik ten Hag og Ralf Rangnick myndu aldrei ná saman hjá Manchester United. Þetta segir í frétt ESPN.
Ten Hag er nýr stjóri Man Utd og ætlar að endurbyggja liðið eftir slæmt gengi á síðustu leiktíð. Hann kemur eftir að hafa gert góða hluti með lið Ajax í Hollandi.
Rangnick stýrði Man Utd seinni hluta síðustu leiktíðar til bráðabirgða eftir að Ole Gunnar Solskjær hafði verið rekinn. Það gekk hins vegar lítið upp hjá Þjóðverjanum og endaði liðið í sjötta sæti ensku úrvalsdeildarinnar.
Rangnick átti að taka við ráðgjafahlutverki hjá Man Utd eftir tímabil en svo verður ekki. Hann tók við austurríska landsliðinu og skömmu síðar var ákveðið að hann yrði ekki áfram á Old Trafford.
Samkvæmt ESPN vildi ten Hag ekki hitta Rangnick í persónu eftir að hann var nýtekinn við. Hann lét það duga að taka fund með honum símleiðis.
