Að minnsta kosti 15 hafa látið lífið vegna úrhellisrigningar og flóða sem hafa staðið yfir í Shanxi-héraðinu í norðurhluta Kína.
Wang Qirui, talsmaður neyðarstjórnar í héraðinu, sagði að tæplega 19 þúsund byggingar hefðu eyðilagst og 18 þúsund til viðbótar hlotið miklar skemmdir.
Þá hafa 15 einstaklingar látið lífið í hamförunum og þriggja einstaklinga er enn saknað.
Eftir mikla þurrkatíð undanfarna vikur kom loks rigning og hefur úrkomumagnið síðastliðna viku jafnast á við rigningu þriggja mánaða tímabils.
Grípa þurfti til tímabundinna lokana í að minnsta kosti 60 kolanámum í héraðinu, en nú hefur starfsemi þeirra hafist á ný í öllum nema fjórum námum.