Hrefna Tómasdóttir birti í gær færslu í Facebook-hópinn Góða systir þar sem hún lýsir yfir óánægju sinni með lakkrísrörin frá Góu. Það hefur verið vinsælt í áratugi að drekka appelsín í gleri í gegnum lakkrísrör. Á sjöundaáratugnum var það líklega ein heitasta tvennan í verslunum borgarinnar og hugsa margir til gjörningins með hlýju.
Hrefna ætlaði að gera vel við sig í vikunni og keypti sér tvennuna vinælu en varð fyrir miklum vonbrigðum. Það sem olli þessum vonbrigðum var að lakkrísrörin voru orðin minni en flaskan sjálf og því ekki lengur hægt að drekka úr flöskunni með rörinu.
„Covid, jarðskjálftar og stutt lakkrísrör. Jæja stelpur nú er það bara þannig að ég er gjörsamlega að geðtruflast á öllu ástandinu – Covid orðið ansi þreytandi – Jarðskjálftarnir að gera út af við mig og þegar maður heldur að það geti ekki versnað þá fær maður lakkrísrör sem passar ekki í flöskuna,“ segir Hrefna í færslunni og segir að þetta sé það sem hafi fyllt mælinn.
Hún biðlaði til Góu að lengja rörin aftur og að það gengi ekki að minnka þau en hækka verðið. Hún telur þessa ákvörðun þeirra hafa einnig áhrif á sölu appelsíns í gleri frá Ölgerðinni en mikil umræða skapaðist um málið á síðunni og þá staðreynd að í þessu samhengi skipti stærðin, hér lengdin, öllu máli.
Í samtali við DV segir Hrefna sem gerir góðlátlegt grín af þessu öllu saman að Helgi framkvæmdastjóri Góu og starfafólk hans hafi brugðist hratt og vel. Beðist var afsökunar á styttingunni og verða rörin lengd héðan í frá.
Hrefna fékk yfir 1200 „like“ á færslu sína og því er ljóst að hún er ekki sú eina sem er ánægð með þessi viðbrögð Góu.
Á næstu vikum ætti fólk að geta notið þess aftur að sötra appelsín í gleri með lakkrísröri.