„Ætlar hæstvirtur ráðherra að ráðast í einhverjar raunverulegar aðgerðir?“ spurði Halldóra Mogensen, þingmaður Pírata á Alþingi, þar sem hún sagði almannatryggingakerfið í lágum forgangi hjá Ásmundi Einari Daðasyni barnamálaráðherra.
Ríkisendurskoðun segir í nýrri stjórnsýsluúttekt, að bæta þurfi málsmeðferð hjá Tryggingastofnunar ríkisins (TR). Sérstaklega er fundið að því að of fáir viðskiptavina TR fái réttar greiðslur.
Bent er á að á tímabilinu 2016-19 hafi endurreikningur bóta leitt í ljós að mikill meirihluti lífeyrisþega fékk ýmist of eða vangreiddar greiðslur vegna mismunar á tekjuáætlun og rauntekjum. Á þessu tímabili fengu 87-90,6% lífeyrisþega rangar greiðslur.
Halldóra segir ljóst af skýrslunni að staða skjólstæðinga Tryggingastofnunar í samskiptum við stofnunina séu ekki trygg og réttindi þeirra virðist ekki vera virt.
„Mun ráðherra setja einhvern mannauð og fjármagn í að ráðast í þær víðtæku aðgerðir sem ríkisendurskoðandi telur þörf á?“ spurði Halldóra.
Ásmundur Einar sagði að ýmsar athugasemdir væru í úttekt Ríkisendurskoðunar sem hægt væri að bregðast við. Enn fremur hefði verið samtal um heildarendurskoðun almannatryggingakerfisins.
„Ég er hérna að reyna að hemja mig og vera eins málefnaleg og mögulegt er en ég er orðin dálítið þreytt á þessum loforðaflaumi frá hæstvirtum ráðherra, því að hann er ofboðslega duglegur að lofa gulli og grænum skógum en svo gerist ekki neitt,“ sagði Halldóra þegar hún kom í pontu öðru sinni.
Hún sagðist ekki átta sig á hvort væri verra fyrir ráðherra félagsmála að gera sér enga grein fyrir því hversu ógagnsætt, skerðandi, óaðgengilegt og ómannúðlegt núverandi kerfi er, eða að ráðherra viti hvert almenna tryggingakerfið er komið og hafi kosið að gera ekkert í því í þrjú ár við völd.
„Hvort er verra?“
Ásmundur sagði beinlínis rangt að ekkert hefði verið gert en hins vegar mætti alltaf gera betur.
„Það er beinlínis rangt að það hafi ekki verið gert. En hins vegar má alltaf gera betur. Þessi skýrsla Ríkisendurskoðunar er mjög gott innlegg inn í þá vinnu og við munum taka hana alvarlega.“