Lið Torino mun ekki mæta til leiks í Rómaborg í dag en þar átti það að mæta Lazio í ítölsku A-deildinni í knattspyrnu. Leiknum hefur samt ekki verið frestað.
Átta smit hafa komið upp í leikmannahópi Torino og heilbrigðisyfirvöld í borginni hafa bannað liðinu að fara til Rómar.
Forráðamenn A-deildarinnar hafa hins vegar gefið út að leikurinn eigi að fara fram í dag og þar með verður Lazio skráður sigurvegari, 3:0.
Það mun þó væntanlega ekki standa til frambúðar. Svipaðar aðstæður komu upp varðandi leik Napoli og Juventus fyrr í vetur og þótt sá leikur hafi verið úrskurðaður 3:0 fyrir Napoli var sá úrskurður kærður og leikurinn fór fram síðar.