Þeir Kjartan Henry Finnbogason og Nikolaj Hansen hafa mikið verið á milli tannanna á fólki. Allt hófst það með olnbogaskoti sem Kjartan veitti Dananum í leik liða þeirra, Víkings og FH, fyrir rúmri viku.
Kjartan slapp við refsingu vegna olnbogaskotsins í leiknum, en Hansen lá blóðugur eftir.
Klara Bjartmarz, framkvæmdastjóri KSÍ, vísaði málinu hins vegar til Aga- og úrskurðarnefndar sambandsins. Var Kjartan að lokum dæmdur í eins leiks bann.
FH-ingar eru reiðir og gáfu út yfirlýsingu vegna málsins. Þar var Klara harðlega gagnrýnd.
Þá fóru stuðningsmenn liðsins á ritvöllinn og létu í sér heyra. Margir vöktu athygli á olnbogaskoti Hansen á Eiði Atla Rúnarssyni, leikmanni HK, í leik liðanna um helgina.
Vilja þeir sjá málið fara sömu leið innan KSÍ og mál Kjartans.
Þetta var tekið fyrir í Stúkunni á Stöð 2 Sport í gær. Þar voru menn sammála um að atvikin væru ekki sambærileg.
„Mér finnst galið að vera að bera þetta saman,“ sagði Baldur Sigurðsson í þættinum.
Hann útskýrði sitt mál. „Nikolaj Hansen lítur aldrei aftur á bak og er að nota hendurnar til að stökkva upp. Hann er á undan.
Þetta gerist bara, því miður. Við höfum allir lent í þessu.“
FH-goðsögnin Atli Viðar Björnsson tók undir með honum.
„Ég held að það sé litlu við þetta að bæta. Það að meiða sig og að það verði óhöpp og árekstrar er því miður bara hluti af leiknum.“
Hér að neðan má sjá olnbogaskot Hansen.
Dæmi hver fyrir sig. https://t.co/UQSYjEfEJD pic.twitter.com/ZxQwBZhHQW
— Kristján Óli Sigurðsson (@kristjanoli) May 22, 2023