Fjórar framlengja hjá nýliðunum

Körfuknattleikskonurnar Nína Jenný Kristjánsdóttir, Arndís Þóra Þórisdóttir, Rebekka Rut Hjálmarsdóttir og Elma Finnlaug Þorsteinsdóttir hafa allar komist að samkomulagi við körfuknattleiksdeild ÍR um að leika áfram með kvennaliðinu á næsta tímabili, þar sem það verður nýliði í efstu deild.

ÍR hafði í vor betur gegn 1. deildarmeisturum Ármanns, 3:2, eftir æsispennandi einvígi sem fór alla leið í oddaleik.

„ÍR-ingar þekkja Nínu vel en hún hefur verið lykilleikmaður hjá ÍR undanfarin ár. Á síðasta tímabili skilaði Nína 9,8 stigum í leik auk þess að taka 6,6 fráköst.

Arndís hefur einnig spilað með liðinu undanfarin ár og verið lykilleikmaður en glímdi við meiðsli á síðasta tímabili. Arndís skilaði 7,2 stigum tímabilið 2020-2021 auk þess að taka 7,1 frákast.

Rebekka er efnilegur leikmaður sem spilaði rúmar 18 mínútur í leik á síðasta tímabili þrátt yfir ungan aldur (18). Var hún með 4,8 stig og 3,5 fráköst í leik, þá spilaði hún kraftmikla vörn og var oft ofarlega, ef ekki efst í +/- tölfræðinni. Leikur Rebekku fór vaxandi yfir tímabilið og átti hún marga af sínum bestu leikjum í úrslitakeppninni.

Elma Finnlaug er ungur og efnilegur leikmaður (16) sem kom af miklum krafti inn í meistaraflokk á síðasta tímabili. Verður gaman að fylgjast með þessum ungu og efnilegu leikmönnum í vetur,“ sagði í tilkynningu frá körfuknattleiksdeil ÍR um leikmennina fjóra.

• Blogga um frétt