Benjamín Netanjahú, forsætisráðherra Ísraels, kom fyrir dómara í Jerúsalem í morgun þegar málflutningur hófst í máli ákæruvaldsins gegn honum. Netanjahú er ákærður fyrir spillingu í embætti, mútur og svik.
Í opnunarræðu sinni sagði saksóknari að Netanjahú hefði nýtt völd sín með ólöglegum hætti og sóst eftir vinagreiðum hjá stjórnendum stórra fjölmiðlafyrirtækja.
Ráðherrann er sakaður um að hafa beðið útgefanda ísraelsks dagblaðs, Yediot Aharonot, um jákvæða umfjöllun gegn því að hann myndi hjálpa til við að hindra útgáfu keppinautardagblaðs. Auk þess er forsætisráðherrann sakaður um að hafa þegið gjafir sem nema rúmum 10 milljónum íslenskra króna frá Hollywood-auðjöfrinum Arnon Milchan og öðrum stuðningsmönnum.
Rúmt ár er liðið frá því Netanjahú var ákærður, en réttarhöldunum hefur ítrekað verið frestað vegna kórónuveirufaraldursins.
Réttarhöldin fara fram á sama tíma og Netanjahú freistar þess að mynda nýja ríkisstjórn til að tryggja áframhaldandi setu sína á stóli forsætisráðherra, sem nú hefur varað í tólf ár. Fjórðu kosningarnar á tveimur árum voru haldnar í Ísrael í síðasta mánuði en enginn stóð uppi sem skýr sigurvegari eftir þær.