Laxeldið nái 200 þúsund tonnum
Setja bókamerki
/frimg/1/44/18/1441801.jpg)
Innan fiskeldisgreinarinnar er talið að framleiðslan á eldislaxi hér á landi geti farið í 200 þúsund tonn sem er um tvöfalt meira en sá hámarkslífmassi sé heimilt er að ala í sjó. Þetta er haft eftir Magnúsi Bjarnasyni, framkvæmdastjóra og meðeiganda í ráðgjafastofunni Mar, í umfjöllun Undercurrent News.
Þar segir að íslensk framleiðsla á laxi hafi í áraraðir verið langt á eftir stærri framleiðsluríkjum og má þar nefna Noreg, Skotland og Færeyjar. Hins vegar sé gert ráð fyrir að hraður vöxtur verði í laxeldinu hér á landi á komandi árum.
„Þetta er atvinnugrein sem hefur verið byggð úr engu á skömmum tíma og íslenskir fjárfestar telja að þeir hafi misst af tækifærum,“ segir Magnús. „En það eru að skapast mikil tækifæri og margt enn hægt að gera. Tilfinningin í greininni er að við getum náð 200 þúsund tonnum, sem er meira en Skotland.“
Til þess að ná þessum markmiðum þarf að minnsta kosti milljarð evra, rúmlega 150 milljarða íslenskra króna, í fjárfestingar í innviði og framleiðslu, að mati Magnúsar. „Það er augljóst að þetta verður áfram áhugaverð atvinnugrein og að það verði hlutfallslega meira íslenskt fjármagn en norskt í framtíðinni.“
106 þúsund tonn í áhættumati
Í júní í fyrra staðfesti Kristján Þór Júlíusson, sjávarútvegs- og landbúnaðarráðherra, tillögu Hafrannsóknastofnunar að nýju áhættumati vegna mögulegrar erfðablöndunar frá laxeldi. Það gerir ráð fyrir að heimilt sé að ala 106 þúsund tonn í sjó umhverfis Ísland. Fól nýja áhættumatið í sér 20% hækkun frá fyrra mati.
Á síðasta ári voru framleidd um 34 þúsund tonn af laxi í 11 laxeldisstöðvum, en þær eru með rekstrarleyfi sem heimila 73.500 tonna hámarkslífmassa í sjó. Útgefin fiskeldisleyfi fyrir allar tegundir eru 16 og er samanlagður leyfilegur hámarkslífmassi þeirra 87.700 tonn.
Hvað landeldi varðar hafa verið gefin út 37 rekstrarleyfi og nemur leyfilegur hámarkslífmassi 22.560 tonnum.
Færri nota rafhlaupahjól eftir djammið
Norskur lögreglumaður dæmdur
Tveggja mánaða flandur um Nýja-Sjáland
Þyngri refsing fyrir að nauðga stjúpdóttur æskuvinar
Sennilega gróðureldur, ekki ný sprunga
Breytingar á skipulagi fréttadeildar RÚV
Laugavegur hjólaferðamannsins að fæðast
Ólíkt ákall fólks á landsbyggðinni