„Ég er gríðarlega spenntur. Ég vona að kjörsókn verði góð og held að hún verði það,“ segir Anton Kári Halldórsson, formaður samstarfsnefndar um Sveitarfélagið Suðurland.
Samhliða kosningum til Alþingis í dag verður kosið um sameiningu fimm sveitarfélaga á Suðurlandi. Sveitarfélögin sem um ræðir eru Rangárþing eystra, Rangárþing ytra, Skaftárhreppur, Mýrdalshreppur og Ásahreppur. Ef íbúar samþykkja sameiningu verður til víðfeðmasta sveitarfélag landsins, 15.659 ferkílómetrar eða um 16% af heildarstærð landsins.
Anton Kári segir að atkvæði í kosningunni verði talin á hverjum stað. „Þetta er ekki flókin talning og úrslit eiga að vera ljós fyrir miðnætti, jafnvel klukkan 23,“ segir hann. Anton fær úrslitin í sínar hendur þegar þau liggja fyrir og mun samstarfsnefndin sjá um að koma þeim á framfæri. hdm@mbl.is