Því var spáð að hæsta hitastig landsins í dag yrði á hálendinu. Veðurstofa Íslands spáir því að það sama verði uppi á teningnum á morgun.
„Ástæðan er einfaldlega sú að þar er sólríkast þessa dagana,“ segir Birgir Örn Höskuldsson, veðurfræðingur hjá Veðurstofu Íslands.
„Núna er hitinn kominn yfir tuttugu gráður á Kirkjubæjarklaustri og það gæti verið að mesti hitinn mælist þarna á Suðausturlandi á láglendi í dag en á svona dögum er ekkert mjög óalgengt að það sé skýjað við ströndina og léttskýjað yfir hálendinu.“
Birgir segir að ekki sé mjög algengt að hæsta hitastigið á öllu landinu sé á hálendinu en það komi þó fyrir.
„Þetta er í rauninni bara sólin að baka svalt hálendið og þá rýkur hitinn upp.“