Íslenska kvennalandsliðið í fótbolta æfði í fyrsta skipti í undirbúningi sínum fyrir Evrópumótið í næsta mánuði á Laugardalsvelli í dag.
Allir leikmenn íslenska liðsins tóku þátt á æfingunni að undanskildum Hallberu Guðnýju Gísladóttur og Gunnhildi Yrsu Jónsdóttur. Þá æfði Guðný Árnadóttir ein, en hún hefur verið tæp vegna meiðsla.
Hallbera, sem leikur með Kalmar í Svíþjóð, lenti á Íslandi síðdegis og kemur til móts við hópinn seinna í dag. Gunnhildur lék með Orlando Pride síðustu nótt og er væntanleg til landsins í fyrramálið.
Fyrsti leikur Íslands á EM er þann 10. júlí næstkomandi gegn Belgíu. Frakkland og Ítalía eru einnig í riðli Íslands.