Zlatan með veiruna og mætir ekki Alfons

Sænski knattspyrnumaðurinn Zlatan Ibrahimovic hefur greinst með kórónuveiruna og er kominn í einangrun á heimili sínu.

Þetta tilkynnti AC Milan, félag hans, í dag, aðeins nokkrum tímum fyrir heimaleik liðsins gegn Alfons Sampsted og félögum í norska toppliðinu Bodö/Glimt sem eru andstæðingar ítalska félagsins í 3. umferð Evrópudeildarinnar á San Siro í Mílanó í kvöld.

Fram kemur í tilkynningu AC Milan að enginn annar hafi reynst smitaður af veirunni í skimun sem allir leikmenn liðsins gengust undir í gær, en áður hafði einn þeirra, Leo Duarte, reynst vera með veiruna.

Zlatan var mjög frískur síðasta mánudagskvöld en þá skoraði hann bæði mörk AC Milan í sigri á Bologna í ítölsku A-deildinni. Hann gerði nýjan samning við félagið fyrir mánuði síðan, til eins árs, en Zlatan er orðinn 38 ára gamall.

• Blogga um frétt