Hörður Björgvin Magnússon, leikmaður CSKA Moskvu og íslenska landsliðsins í knattspyrnu, þurfti að fara meiddur af velli í 2:1-sigri liðsins gegn Tombov í rússnesku úrvalsdeildinni í dag.
Frá þessu er greint á Fótbolta.net.
Hörður Björgvin meiddist á 70. mínútu leiksins, að því er virtist án þess að nokkur hafi snert hann, og þótt hann hafi borið sig vel þurfti hann samt sem áður að yfirgefa völlinn á börum.
Að svo stöddu er ekki vitað hversu alvarleg meiðslin eru.
Leikurinn í dag var sá fyrsti undir stjórn Króatans knáa Ivica Olic og voru bæði Hörður Björgvin og Arnór Sigurðsson á sínum stað í byrjunarliði CSKA Moskvu.
Arnór lék allan leikinn á hægri kantinum og Hörður Björgvin byrjaði í hjarta varnarinnar.