Ísak Bergmann Jóhannesson leikmaður IFK Norrköping er á óskalista nokkra félaga í Evrópu en óvíst er hvort eitthvað gerist í hans málum. Ísak hefur verið orðaður við fjölda stórliða síðustu daga, vikur og mánuði.
Liverpool er eitt þeirra félaga sem hafa sýnt Ísaki áhuga síðustu mánuði og eru stuðningsmenn félagsins byrjaðir að fylgjast spenntir með.
„Ísak er einn eftirsóttasti leikmaðurinn á markaðnum í Evrópu þessar stundir, þrátt fyrir að vera aðeins 18 ára hefur hann reynst lykilmaður hjá Norrköping,“ segir í umfjöllun Rousing The Kop.
„Ísak mun að öllum líkindum kosta um 6 milljónir punda, hindrunin er samt til staðar. Hann vill ekki fara í ensku úrvalsdeildina, hann vill spila í byrjunarliði. Liverpool þarf að lofa honum spilatíma.“
Í umfjöllun kemur að næsta skref Ísaks sé líklega ekki til Liverpool. „Hann hefur sérstaka hæfileika, við sjáum samt ekki 18 ára strák taka skref frá Svíþjóð í byrjunarlið Liverpool. Vonandi tekur hann fyrst minna skref og kemur svo til Liverpool.“
Ísak er 18 ára gamall og er nú að undirbúa sig undir landsleik gegn Póllandi á eftir, hann hefur byrjað bæði gegn Mexíkó og Færeyjum í síðust leikjum.
Ísak var spurður um framtíð sína í síðustu viku. Mikið af kjaftasögum er í gangi um framtíð Ísaks en hann pælir lítið í slíku. „Ég er ekki mikið að spá í þessu, ég fókusa á fótboltann. Það er hægt að spyrja umboðsmann minn, ég er núna að einbeita mér að Færeyja leikjum. Mér líður best að einbeita mér að fótboltanum, sama hvort það sé næsta æfing eða leikur.“