Tveir farvegir hafa myndast
Setja bókamerki
Tveir farvegir hafa myndast fyrir hraunið sem rennur frá gígnum fyrir ofan Meradali.
Einar Hjörleifsson, náttúruvársérfræðingur hjá Veðurstofu Íslands, segist ekki vita hvenær seinni farvegurinn myndaðist. Hann bætir við að betra sé að átta sig á hraunfarveginum þegar rökkva tekur á gossvæðinu.
Ekki hafa myndast fleiri gossprungur en þær tvær sem mynduðust í gær. Jarðsig mældist tæpum hálfum kílómetra norðaustan við gígana í Geldingadölum. Sú lægð í landinu hefur ekki opnast en fylgst verður áfram með svæðinu í nótt, að sögn Einars.
Gas fyrst í átt að Reykjanesbæ
Birgir Örn Höskuldsson, veðurfræðingur hjá Veðurstofu Íslands, segir að í nótt snúist í suðaustan- og austanátt á svæðinu og að í nótt og í fyrramálið gæti gas blásið í átt að Reykjanesbæ og Vogum á Vatnsleysuströnd.
Í fyrramálið ætti að snúast meira í háaustanátt og þá er líklegt að gasið fari meira yfir óbyggt svæði í fjalllendi. Annað kvöld er spáð norðaustanátt og þá gæti gasið blásið yfir Grindavík.
Birgir Örn segir að gaslíkan Veðurstofunnar sýni ekki mikla mengun á nærliggjandi svæðum en það eigi eftir að koma betur í ljós síðar í kvöld.
Snjókoma í fyrramálið
Opnað verður fyrir umferð um gosstöðvarnar í fyrramálið. Þá er spáð snjókomu og heldur hún áfram með köflum eftir hádegi. Einhver strekkingur gæti orðið á svæðinu og því er um að gera að vera vel búinn, segir Birgir Örn.
Óverulegt hraunrennsli í Geldingadölum
Eftir hádegi í dag voru teknar loftmyndir úr flugvél Garðaflugs með Hasselblad-myndavél Náttúrufræðistofnunar og unnin eftir þeim landlíkön af hraununum í Geldingadölum og Meradölum.
Niðurstöðurnar benda til þess að hraunrennsli sé nú óverulegt í Geldingadölum en rennsli frá nýju sprungunni er 4-5 rúmmetrar á sekúndu.
Samanlagt rennsli á báðum stöðum er metið 5-6 rúmmetrar á sekúndu. Aukningin sem fram kom í gær er því að mestu gengin til baka og hraunrennsli svipað og var dagana áður en nýja sprungan opnaðist.
Telur loftslagsdóm MDE rangan
Sautján greinst með kíghósta
Einn handtekinn út af þjófnaðinum í Hamraborg
Hluti peninganna kominn í leitirnar
90% samþykktu verkfallsaðgerðir
Ríkisfjármálin ósjálfbær þó staðan sé góð
Frelsi sem fylgdi því að loka Önnu Jónu