Guðmundur Örn Jóhannsson, framkvæmdastjóri sölu, markaðsmála og dagskrárgerðar hjá Torgi, sótti móður sína á Landspítalann í gær og fór þaðan með hana á hjúkrunarheimilið Skjól.
„Nú tekur við biðtími þangað til hún kemst á eitthvert elliheimili þar sem hún getur fengið sitt eigið herbergi en það getur tekið allt að 6 mánuði,“ segir Guðmundur í færslu sem hann birti á Facebook-síðu sinni í gær. Í færslunni birtir hann mynd af herberginu sem móðir hans þarf að dvelja í á meðan hún bíður eftir því að komast á elliheimili.
„Þetta er herbergið sem hún þarf að dvelja í með annari konu sem hún þekkir ekki. Mjög kuldalegt allt saman,“ segir hann en myndina af herberginu má sjá hér fyrir neðan.
Guðmundur er ósáttur með aðstöðuna þarna á Skjóli og veltir því fyrir sér hvers vegna herbergin eru ekki betri. „Hvar er metnaðurinn, myndi það setja þjóðina á hausinn að leggja aðeins meira í þetta, myndu hlýlegri gardínur, fallegir litir á veggjum, þil á milli rúma, stóll svo hægt sé að tilla sér og falleg gerviblóm og kannski eins og ein falleg mynd úr IKEA á vegginn, setja allt á hliðina,“ segir hann.
„Nei það þarf að halda úti 63 þingmönnum, 12 ráðherrum, hver með 2 til 3 aðstoðarmenn, ráðuneytum, sendiráðum, hinum ýmsu nefndum, borgar og bæjarfulltrúum, auknum styrkjum til stjórnmálaflokka svo eitthvað sé nefnt.“
Guðmundur segir að móðir sín hafi haft samband við sig nokkrum sinnum í gær og sagt að hún vilji fara heim. „Þetta er það sem við bjóðum eldra fólki upp á í dag, hefur greitt skatta og skyldur sínar alla tíð. Mamma er búinn að hringja nokkrum sinnum í dag og vill komast heim.“
Að lokum segir Guðmundur að nú sé kominn tími til að horfa til eldri borgara og sýna fólkinu sem tilheyrir þeim hópi virðingu þeirra síðustu ævidaga.
DV er í eigu Torgs.
