Franski miðjumaðurinn Paul Pogba hefur verið að spila vel undanfarið fyrir félag sitt Manchester United en tilkynningin um nýja Amazon Prime heimildarmynd um kappann hefur vakið reiði hjá stuðningsmönnum United og er talin koma á röngum tíma.
Stan Collymore segir í grein á Mirror að þetta sé einmitt ástæðan afhverju United ætti að reyna að losa sig við Pogba í sumar.
„Það væri miklu betra fyrir hann að setja alla orku sína og tíma í fótbolta en ekki í svona verkefni. Ég er ekki að segja að allir þurfi að vera eins og Roy Keane og einblína eingöngu á fótbolta, en leikmenn fá aldrei neitt út úr svona verkefnum.“
„Ef ég væri stuðningsmaður United, þá myndi ég eingöngu vilja að Pogba svaraði á vellinum en ekki í einhverri heimildarmynd.“
Solskjaer var spurður út í þetta á blaðamannafundi og þetta truflar hann ekki. Hann segir Pogba vera fagmann fram í fingurgómana.
„Paul hefur verið í sviðsljósinu frá því að hann kom til Man. United, svo ég sé ekkert vandamál við þetta. Hann vill fá eins mikið út úr ferlinum og hann getur,“ sagði Solskjaer á blaðamanna fundi.
„Aðalmarkmið hans verður alltaf að vinna fótboltaleiki fyrir okkur.“
