8. umferð: Met Heimis jafnað, KR slapp, Kristinn sautjándi
Setja bókamerki
Markamet Víkings var jafnað, KR-ingar sluppu við að setja tvö óæskileg met og tveir þeirra náðu stórum áföngum.
Þetta var meðal þess sem gerðist í áttundu umferð Bestu deildar karla í fótbolta sem lauk í gærkvöld.
Fimm leikja taphrinu KR-inga lauk með sigri á Fram í Úlfarsárdal, 2:1, í gærkvöld. Atli Sigurjónsson skoraði fyrsta mark liðsins í sex leikjum og í samtals 470 mínútur og kom í veg fyrir að félagsmetið frá árunum 1976-77 yrði slegið. Þá skoraði KR ekki í 516 mínútur í deildinni. Sigurinn þýðir jafnframt að verstu taphrinur félagsins í efstu deild eru áfram frá árunum 1977 og 1971 en á hvoru ári fyrir sig tapaði KR sex leikjum í röð.
Kristinn Jónsson, vinstri bakvörður KR, lék sinn 250. leik í efstu deild gegn Fram. Hann er sautjándi leikmaðurinn í sögu deildarinnar sem nær þessum leikjafjölda. Kristinn lék 148 leiki fyrir Breiðablik og hefur nú spilað 102 fyrir KR.
Kennie Chopart, hægri bakvörður og fyrirliði KR, lék sinn 200. leik í deildinni. Þar af eru 150 fyrir KR og hann er orðinn tíundi leikjahæsti leikmaður félagsins í deildinni frá upphafi. Chopart lék áður 11 leiki fyrir Fjölni og 39 fyrir Stjörnuna. Hann er fjórði erlendi leikmaðurinn sem spilar 200 leiki í deildinni, á eftir Steven Lennon (211), Ian Jeffs (207) og Paul McShane (207).
Steven Lennon skoraði annað mark FH í sigri í Vestmannaeyjum í gærkvöld, 3:2, og það er hans 101. mark í efstu deild. Hann jafnaði þar með við Guðmund Steinsson, sem lék með Fram og Víkingi, og þeir eru nú jafnir í fjórða sæti yfir mestu markaskorara deildarinnar frá upphafi.
Nikolaj Hansen, fyrirliði Víkings, jafnaði markamet Heimis Karlssonar fyrir félagið þegar hann skoraði seinna markið í sigri liðsins á HK, 2:1, í Kórnum í fyrrakvöld. Þetta var 37. mark Danans í deildinni fyrir Víking, í 107 leikjum, en Heimir skoraði 37 mörk í 116 leikjum fyrir Víking í deildinni á árunum 1978 til 1984. Þá er Nikolaj orðinn tíundi leikjahæsti Víkingurinn í deildinni frá upphafi með 107 leiki.
Víkingar fengu á sig sitt annað mark á tímabilinu þegar Eyþór Aron Wöhler úr HK skoraði hjá Ingvari Jónssyni í sigri Víkinga í Kórnum, 2:1. Víkingur er þriðja liðið í sögu deildarinnar sem fær aðeins á sig tvö mörk í fyrstu átta umferðunum. Skagamenn voru með markatöluna 16:2 eftir átta umferðir árið 1995 og Framarar voru með markatöluna 17:2, nákvæmlega eins og Víkingar nú, eftir átta umferðir árið 1988.
Framarar með Jón Þóri Sveinsson, núverandi þjálfara sinn, í hjarta varnarinnar og Birki Kristinsson í markinu gerðu hins vegar enn betur, héldu markinu hreinu í næstu fimm leikjum og voru með markatöluna 27:2 eftir 13 umferðir.
Víkingar héldu áfram að bæta sína bestu byrjun í deildinni frá upphafi með því að vinna áttunda leikinn í jafnmörgum umferðum.
Gísli Eyjólfsson er orðinn sjötti markahæsti leikmaður Breiðabliks í deildinni frá upphafi eftir að hafa skorað seinna markið í sigrinum á KA, 2:0, á Kópavogsvelli á sunnudaginn. Þetta var 29. mark Gísla og hann fór fram úr Alfreð Finnbogasyni sem skoraði 28 mörk fyrir Blikana.
Hilmar Árni Halldórsson er orðinn fjórði leikjahæstur Stjörnumanna í efstu deild frá upphafi. Hann lék sinn 132. leik fyrir félagið í jafnteflisleiknum gegn Fylki í gærkvöld, 2:2, og deilir nú fjórða sætinu með Heiðari Ægissyni.
Hornfirðingar skoruðu bæði mörk ÍBV í ósigrinum gegn FH, 2:3, þeir Hermann Þór Ragnarsson og Alex Freyr Hilmarsson.
Ísfirðingar sáu um fyrra mark Fylkis í jafnteflinu við Stjörnuna, 2:2. Pétur Bjarnason skoraði þar sitt fyrsta mark í efstu deild eftir sendingu frá Þórði Gunnari Hafþórssyni. Þeir voru samherjar hjá Vestra árin 2016 til 2019.
Úrslitin í 8. umferð:
Breiðablik - KA 2:0
HK - Víkingur R. 1:2
Valur - Keflavík 0:0
ÍBV - FH 2:3
Stjarnan - Fylkir 2:2
Fram - KR 1:2
Markahæstir í deildinni:
6 Stefán Ingi Sigurðarson, Breiðabliki
5 Adam Ægir Pálsson, Val
5 Gísli Eyjólfsson, Breiðabliki
5 Örvar Eggertsson, HK
4 Andri Rúnar Bjarnason, Val
4 Kjartan Henry Finnbogason, FH
4 Guðmundur Magnússon, Fram
4 Ísak Andri Sigurgeirsson, Stjörnunni
4 Nikolaj Hansen, Víkingi
4 Tryggvi Hrafn Haraldsson, Val
3 Aron Jóhannsson, Val
3 Ásgeir Sigurgeirsson, KA
3 Benedikt Daríus Garðarsson, Fylki
3 Birnir Snær Ingason, Víkingi
3 Guðmundur Baldvin Nökkvason, Stjörnunni
3 Höskuldur Gunnlaugsson, Breiðabliki
3 Ólafur Karl Finsen, Fylki
Næstu leikir:
25.5. KA - Víkingur R. (15.umferð)
25.5. Breiðablik - Valur (13.umferð)
28.5. FH - HK
28.5. Fylkir - ÍBV
28.5. KR - Stjarnan
29.5. KA - Fram
29.5. Víkingur R. - Valur
29.5. Keflavík - Breiðablik
„Ég er forsetaframbjóðandi, ekki hommi í framboði“
Ört vaxandi tjón vegna netsvika
Skoða að taka upp gjaldskyldu á notkun nagladekkja
Vænta þess að um tímabundið ástand sé að ræða
Erum komin í öruggt skjól í Sunnusmára
Um 60 skjálftar – Landris heldur áfram
Samþykkt kaup á fasteignum að virði 52 milljarða
Kortavelta ferðamanna dregst mikið saman