Hjúkrunarfræðingurinn ekki laus allra mála enn

Árni Sæberg skrifar 26. apríl 2024 16:03

Hjúkrunarfræðingar fylktu liði að Héraðsdómi Reykjavíkur á sínum tíma til þess að sýna Steinu stuðning. Vísir/Vilhelm

Dómur í máli hjúkrunarfræðings, sem var sýknaður af ákæru fyrir manndráp á geðdeild Landspítala, hefur verið ómerktur í Landsrétti. Lagt hefur verið fyrir héraðsdóm að taka málið til meðferðar á ný og fella síðan á það efnisdóm.

Steina Árnadóttir, 62 ára gamall hjúkrunarfræðingur, var sýknuð í héraði af ákæru um að hafa valdið dauða konu með geðklofa á sextugsaldri á geðdeild Landspítalans 16. ágúst árið 2021. Hún var ákærð fyrir manndráp í opinberu starfi.

Héraðsdómur Reykjavíkur taldi sannað að hún hefði valdið dauða sjúklingsins með því að hella næringardrykk upp í hann þar til hann kafnaði. Steina var sýknuð þar sem ásetningur hennar til manndráps þótti ekki sannaður.

Gerði hvorki varakröfu um gáleysi né líkamsárás

Í ákæru voru engar varakröfur gerðar um heimfærslu til refsiákvæða. Í úrskurði Landsréttar, sem kveðinn var upp í dag, segir að Steina hafi verið sýknuð af ákæru um manndráp samkvæmt 211. grein almennra hegningarlaga, sem og öðrum þeim brotum sem henni voru gefin að sök í ákæru.

Í forsendum héraðsdóms hafi verið tekið fram að í málinu hefði ekki verið ákært fyrir brot gegn 215. grein almennra hegningarlaga, sem varðar manndráp af gáleysi, og hefði það því ekki verið flutt með tilliti til þess.

Í greinargerð ákæruvaldsins til Landsréttar hafi komið fram að færi svo að rétturinn teldi ósannað að ásetningur Steinu hefði staðið til að svipta sjúklinginn lífi væri byggt á því að líta bæri á háttsemina sem stórfellda líkamsárás sem bani hefði hlotist af og yrði hún samkvæmt því heimfærð til 2. málsgreinar 218. greinr almennra hegningarlaga, en yrði ekki á það fallist teldi ákæruvaldið í það minnsta liggja fyrir að Steina hefði svipt sjúklinginn lífi svo að varðaði hana refsingu samkvæmt 215. grein laganna.

Héraðsdómi hafi borið að veita flytjendum færi á að flytja málið eins og um gáleysi væri að ræða

Í úrskurði Landsréttar kom fram að ef héraðsdómur teldi vafa leika á því að Steina hefði haft ásetning til að svipta sjúklinginn lífi, svo að fullnægt væri huglægum refsiskilyrðum 211. greinar almennra hegningarlaga, hefði dóminum borið að gefa sakflytjendum færi á að flytja málið út frá því hvort heimfæra mætti ætlað brot hennar undir 2. mgr. 218. gr. laganna, ellegar 215. gr. þeirra.

Það hefði ekki verið gert og yrði ekki leyst úr því fyrir Landsrétti hvort málið yrði dæmt eftir öðrum refsiákvæðum en í ákæru greindi, enda myndi slík úrlausn ekki fela í sér endurskoðun á niðurstöðu héraðsdóms.

Var hinn áfrýjaði dómur því ómerktur án kröfu og lagt fyrir héraðsdóm að taka málið til meðferðar á ný og fella síðan á það efnisdóm

Andlát á geðdeild Landspítala Dómsmál Heilbrigðismál Geðheilbrigði Landspítalinn

Tengdar fréttir

Segir brýnt að Landspítalinn dragi lærdóm af málinu

Lögmaður hjúkrunarfræðings sem sýknuð var af ákæru um manndráp í opinberu starfi segir dóminn sem féll í héraðsdómi í dag afdráttarlausan og mikinn sigur. Formaður Félags íslenskra hjúkrunarfræðinga segir niðurstöðuna mikilvæga stéttinni allri.

21. júní 2023 19:24

Virðist hafa tekið pirring út á sjúklingnum

Hjúkrunarfræðingur sem er ákærður fyrir að valda dauða sjúklings á geðdeild Landspítalans tók pirring vegna aðstæðna á deildinni út á sjúklingnum, að mati saksóknara í málinu. Þrátt fyrir að hann hafi ekki ætlað að drepa sjúklinginn hafi hann gengið fram af offorsi og mátt vera ljóst hverjar afleiðingarnar yrðu.

26. maí 2023 13:34

Undirmönnun, álag og fyrirmæli sem komust ekki til skila

Forstjóri Landspítalans staðfesti að aðstæður á geðdeild hafi verið ófullnægjandi þegar kona lést þar fyrir tæpum tveimur árum í framburði fyrir dómi í morgun. Innri rannsókn spítalans leiddi í ljós að vaktin var undirmönnuð, mikið álag var á starfsfólki, fyrirmæli skiluðu sér ekki og sjúklingurinn ekki vistaður á heppilegum stað. Þá hafði ákærða unnið nítján vaktir á sextán dögum fyrir andlát sjúklingsins.

26. maí 2023 11:10

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir