Stytting kallar á fleiri lögreglumenn

Áhrif af styttingu vinnuvikunnar hjá lögreglunni eru ekki komin fram að fullu, að því er fram kemur í svari Jóns Gunnarssonar dómsmálaráðherra við fyrirspurn Þorbjargar Sigríðar Gunnlaugsdóttur þingmanns Viðreisnar um starfandi lögreglumenn.

Frétt af mbl.is

Evrópskur samanburður „sláandi“

Einn liður fyrirspurnar Þorbjargar snerist um það hvort stytting vinnuvikunnar hefði haft áhrif á lögregluna í landinu hvað varðar þörf fyrir fjölda starfandi lögreglumanna sem og á kostnað.

„Samkvæmt upplýsingum frá ríkislögreglustjóra er reiknað með að verkefnið Betri vinnutími í vaktavinnu komi til með að hafa þau áhrif að fjölga þurfi um 50-70 menntaða lögreglumenn. Fjöldinn færi eftir vaktaskipulagi, við hvaða fjölda er miðað í upphafi og hvernig breytingin hefur áhrif á röðun á vaktir sem hafa mismunandi vægi í vinnuskilum,“ segir í svari dómsmálaráðherra.

„Ríkislögreglustjóri hefur ekki metið endanlegan kostnað er varðar styttingu vinnuvikunnar enda er hann líklega ekki kominn fram að fullu. Kostnaðarmat fjármála- og efnahagsráðuneytisins var um 700 millj. kr. en í kostnaðaráætlunum ríkislögreglustjóra var reiknað með um 900 millj. kr,“ segir þar enn fremur.