Karólína Lea Vilhjálmsdóttir og lið hennar Bayern Munchen er Þýskalandsmeistari í knattspyrnu. Þetta er fyrsti titill Bayern síðan 2016 en Wolfsburg hefur unnið deildina síðustu fjögur tímabil.
Þetta varð ljóst í dag er Bayern sigraði Frankfurt 4-0. Linda Dallmann skoraði fyrstu tvö mörk Bayern, Klara Buhl bætti við því þriðja og Lea Schuller gulltryggði sigurinn í uppbótartíma. Karólína byrjaði á bekknum en kom inn á þegar um 5 mínútur voru eftir af venjulegum leiktíma.
Alexandra Jóhannsdóttir, leikmaður Frankfurt, byrjaði einnig á bekknum en hún kom inn á í hálfleik. Frankfurt lauk keppni í 6. sæti.
Karólína og Alexandra gengu til liðs við þýsku liðin eftir síðasta tímabil með Breiðablik.