Íslenski landsliðsmaðurinn Mikael Neville Anderson var hetja AGF þegar hann skoraði sigurmarkið í sínum fyrsta leik fyrir félagið í 1:0 sigri gegn Vejle í dönsku úrvalsdeildinni í knattspyrnu í dag.
Mikael gekk til liðs við AGF rétt fyrir lokun félagaskiptagluggans í lok síðasta mánaðar þegar hann var keyptur frá Midtjylland.
Hann kom inn á sem varamaður í hálfleik í dag og skoraði sléttum stundarfjórðungi síðar, eftir klukkutíma leik.
Sannkölluð draumabyrjun hjá Mikael, en um var að ræða fyrsta sigur AGF á tímabilinu.
Jón Dagur Þorsteinsson var á sínum stað í byrjunarliði AGF og lék allan leikinn.
Með sigrinum spyrnti liðið aðeins við fótum og færði sig upp í 10. sæti deildarinnar, þar sem liðið er nú með 6 stig að loknum átta umferðum.
Vejle er eitt og yfirgefið í 12. og neðsta sæti með aðeins 1 stig.