77% samdráttur í afla í mars

Landaður afli í mars var rúmlega 60 þúsund tonn sem er 77% minna en í mars 2023, að því er fram kemur á vef Hagstofu Íslands. Samdráttur varð í nær öllum fisktegundum, en ljóst er að loðnubresturinn hefur afgerandi áhrif þar sem loðnuaflinn í mars á síðasta ári nam rétt rúmlega 215 þúsund tonnum.

Margar afurðastöðvar hafa verið að nýta kolmunna í stað kolmunna í vetur, en kolmunnakvótinn jókst verulega milli fiskveiðiári. Tókst að landa heilum 18.184 tonnum í mars síðastliðnum á óti einu tonni í sama mánuði í fyrra.

Þorskaflinn dróst saman um 9% en sífellt fleiri útgerðir eru að klára veiðiheimildir sínar í tegundinni. Ufsinn er þó mun meira áhyggjuefni þar sem 14% samdráttur í lönduðum ufsa í mars má ekki rekja til skort á veiðiheimildum heldur þeirrar alvarlegu stöðu að erfitt reynist að veiða tegundina.

Fram kemur á vef Hagstofunnar að heildarafli á tólf mánaða tímabilinu frá apríl 2023 til mars 2024 var tæplega 1,1 milljón tonn sem er 26% minna en aflinn á sama tólf mánaða tímabili ári fyrr. Helsta ástæðan fyrir þessum samdrætti var engin loðnuveiði.

• Blogga um frétt