Brian Laundrie, unnusti bandaríska lífsstílsbloggarans Gabby Petito, svipti sig lífi að því er kemur fram í yfirlýsingu frá lögmanni fjölskyldu hans.
Laundrie kom heim úr ferðalagi í september án unnustu sinnar Gabby og skömmu síðar fannst lík hennar í Wyomingríki. Hún hafði verið myrt og hóf lögregla rannsókn þegar í stað þar sem öll spjót beindust að Laundrie.
Hans var leitað í um mánuð áður en lík hans fannst í Flórída síðla októbermánaðar. Málið allt hefur vakið heimsathygli.
„Chris og Roberta Laundrie hafa verið gefnar þær upplýsingar að dánarorsök hafi verið skotsár … og að þetta hafi verið sjálfsáverkar,“ sagði lögmaðurinn í yfirlýsingu sinni.