Markvörðurinn ungi Viktor Gísli Hallgrímsson átti stórleik fyrir GOG frá Danmörku í 33:24-sigri danska liðsins á heimavelli gegn Pfadi Winterthur frá Sviss í 2. umferð Evrópudeildarinnar í handbolta í dag. Viktor varði 17 skot og var með 45 prósent markvörslu.
Sænska liðið Kristianstad gerði góða ferð til Póllands og vann 25:24-sigur á útivelli gegn Azoty Pulawy. Ólafur Andrés Guðmundsson skoraði tvö mörk fyrir Kristianstad en Teitur Örn Einarsson komst ekki á blað.
Ýmir Örn Gíslason skoraði þrjú mörk fyrir Þjóðverjana í Rhein-Neckar Löwen í 28:22-útisigri á danska liðinu Holstebro á útivelli. Alexander Petersson var ekki í leikmannahópi Löwen og Óðinn Þór Ríkharðsson komst ekki á blað hjá Holstebro.
Þá komst Elvar Örn Jónsson ekki á blað hjá danska liðinu Skjern sem vann afar góðan 31:30-heimasigur á Montpellier frá Frakklandi.
Síðari leikir einvígjanna fara fram á þriðjudaginn eftir viku.