Midtjylland vann nauman 1:0 sigur á Brøndby í dönsku úrvalsdeildinni í dag og hirti með sigrinum toppsætið af Brøndby. Mikael Anderson var í byrjunarliði Midtjylland í leiknum og Hjörtur Hermannsson var í byrjunarliði Brøndby.
Sigurmark leiksins skoraði gíneski framherjinn Sory Kaba á 19. mínútu þegar hann skallaði inn skallasendingu Erik Sviatchenko í kjölfar aukaspyrnu Awer Mabil.
Mikael byrjaði leikinn í stöðu sóknartengiliðs og var tekinn af velli eftir 62 mínútur.
Hjörtur Hermannsson spilaði fyrstu 80 mínúturnar í miðvarðarstöðunni hjá Brøndby.
Sem áður segir komst Midtjylland upp fyrir Brøndby með sigrinum og er nú einu stigi fyrir ofan í æsispennandi baráttu um danska meistaratitilinn.